ياريتني ما خرجت من الجيش
******************
انا كنت عسكري واخذت شريطين
وبقيت انزوح ولا اجدع شاويش
وفي سنة الف وتسعمايه وتمانين
سلمت المخله وودعت الجيش
وسلمت البياده واربع بطاطين
ياريتني ماخرجت من الجيش
مصنع الرجاله الصامدين
اللي ماتخافش ولا تنحنيش
******************
كنت ابعت لامي الرساله
واقولها ياما ماتعيطيش
ابنك راجل وزينة الرجاله
ولما اروح وما اجيش
افرحي وقولي ابني في الجنه
وعليه ما ينبكيش
ياريتني ماخرجت من الجيش
مصنع الرجاله الصامدين
اللي ماتخافش ولا تنحنيش
******************
كانت ايام جميله
بيقولوا عليها مابتعديش
كدب والله وحياة ستي امينه
ذكريات وماتتنسيش
واللي ينساها مايطمرش فيه
خير البلد ديه والملح والعيش
ياريتني ماخرجت من الجيش
مصنع الرجاله الصامدين
اللي ماتخافش ولا تنحنيش
******************
فين ايامك ياعسكري جرجوب
بتاع المطبخ كان شكله بيضحكني
وبالرغم من اسمه
كان نفسه في الاكل جميل
ولا اذان اللحمه
والرز والخضار مالهوش مثيل
ولا المسقعه يعني الطبخه السوده
تخليك زي الديدبان تلف طول الليل
ياريتني ماخرجت من الجيش
مصنع الرجاله الصامدين
اللي ماتخافش ولا تنحنيش
**************
فاكره ياما الواد اسلام
ابن جارتنا ام فرحات
كان بيصلي بينا ويقف امام
وحياة الغالي ابويا علي ايدي مات
ووشه كان زي فلقة القمر
وفي نعشه طاير زي الحمام
قبل مايموت بساعتين
سألته مالك سارح في ايه يااسلام
قالي مصر خايف عليها من الغدارين
ودخلت الخيمه وجبت الاعلام
واطينا عليها وبوسنها
وكانت اغلي بوستين
ياريتني ماخرجت من الجيش
مصنع الرجاله الصامدين
اللي ماتخافش ولا تنحنيش
******************
عارف ياصاحبي
وحياتك عندي
اكتافي الاتنين
كبرت في الجيش
وبقيت ولا المصارعين
زي الهجمه عافي
اضرب اربعه وتلاته واتنين
ياريتني ماخرجت من الجيش
مصنع الرجاله الصامدين
اللي ماتخافش ولا تنحنيش
*******************
الله يرحمك ياحاصول كامل
لما كنت تتكلم
صوتك يجلجل
ولما كنت تمشي
الارض تزلزل
وعلمتني ازاي ابقي راجل
وازاي اكون من الصابرين
يارتني ماخرجت من الجيش
مصنع الرجاله الصامدين
اللي ماتخافش ولا تنحنيش
*******************
كلمات بسيوني صديق
ليست هناك تعليقات:
إرسال تعليق