بحب الشتا
**********
بحب الشتا و برده
وافتكر ذكراياتي
وابويا يجيب القصعه
ويعمل راكية نار تدفيني
ويحط الخشب وقوالحه
وكفوفنا علي وش النار
وحلة العدس ابو جبه
نغرق فيها ونقلبها هزار
**************
بحب الشتا وهدؤه
وافتكر ذكراياتي
واقف في البلكونه
والبس زعبوطي
وادخل وسط الاوضه
واحكيلهم حكياتي
امنا الغوله وابو رجل مسلوخه
ويشدوا في كتفي احفادي
**************
بحب الشتا والعابه
وافتكر ذكراياتي
لما اجري تحت المطره
واغني يامطرة رخي رخي
يقولولي فين الاغاني ديه
ويفطسوا من الضحك عيالي
اقولهم البركه في المحمول
وزمن توهان العقول
***************
بحب الشتا والدنيا عايمه
وافتكر ذكرياتي
لما كنت اشمر رجلي
وابلبط في الطينه
وازروط.هدومي
وامي تغسلها وهي فرحانه
وتقولي هاأملصلك ودانك
اخرشقاوة يابسيوني
****************
بحب الشتا وزعابيبه
في امشير وافتكر زكرياتي
والعفره تعمي عنيه
زي العسل علي قلبي
ووقت الضهريه
انام وشخر وتشخيري
ولا اجمل سيمفونيه
واخد كفايتي من نومي
*****************
بحب الشتا وايام الشتا
وافتكر ذكرياتي
لما كنت في الجيش
وكانت ايام تدريبي
دفعة عشرة شهر عشرة
عسكري بطل مايهمنيش
من برد الشتا ياعزيزي
واقف خدمه زي الديدبان
برنجي وكنجي وشنجي
عيني يمين وشمال
وازعق بصوتي
ها مين هناك
والهوي يضرب في قفايا
والحركة تدفيني
**************
كلمات بسيوني صديق
ليست هناك تعليقات:
إرسال تعليق