الحُب
.
(إسم كَان)
لما كَان فِـ يوم بِـ يِجمَع
الأحِبّة مِن زَمان
لما باعوا وفجأة مشيوا
جُم عليا بجد قسيوا
قلبى كان مقهور بِشِدة
لما راحوا فـ وقت (شِدّة)
كنت بعاني مِن كُسور
كان ترتيبى للأمور
إني (أشَكِل) نَفسي فِيهم
بس مِش هاكون (مَكسور)
أصل الحُب (ضمير) و ذِمّة
مش مجرد بس لَمّة
أو نقرب بس شكلاً
مِن غِير حُضن وَيّا (ضَمّة)
دافية جِداً فِـ المَشَاعِر
فيها القلب يكون حنون
لكن لو في يوم تِهون
راح يِبيعَك الأمَان
مش هاتعرف (السِكون)
.
أصل الحُب
لو كان (فعل)
كان لابد يكون فِـ (مصدر)
حاجة باينة فِـ (المُقَرر)
مش مُرتَبِطة (بِالزمان)
أو بِـ تِشترط (مَكان)
او بِحجّة شِبه فارغة
أي عِشق لازمهُ دَمغة
فى التَصرُف بإهتمام
يُبقى فِعل مِش كَلام
ويا جمع فِـ المشاعِر
زي (صِيغِة المُبَالغَة)
.
وأوعى تِتعب أو تِفكر
بإختصار الحُب (جملة)
مِـ (المؤَنَث) و (المُذَكّر)
مِش مُهِم مين بِيعشق
أو بيحب التاني أكتر
المهم كل واحد
للظروف يكون مِقَدّر
.
و الحقيقة
في (التَرَادُف)
أي كلمة لو تِصادف
فِـ (المُضاد) ليها جَرح
لازماً تبقى بجد عارف
إن مِن قَرر وِ شَاء
إنه يقتل الوفاء
راح يدوق مِـ الوِحدَة كأس
بعد لَحظِة الفُرَاق
مهما كان كلام مَعسول
مهما تِعمِل أو تقول
مُستَحِيل الماضي يِرجَع
عُمرَك شوفت مَرة (فاعِل)
كان (إعرابه) فِـ يوم (مَفعول) ؟
.
وإختصاراً للكلام
ناقِص آخر (إستفهام)
تِعمِل إيه لو يوم لقيت
إن حُبَك (فِعل مَبَني)
فوق كَلام ووهم فَاضي ؟
الإجابة الصَح هي
إن الحُب مِش هَايبدأ
لو كان أصلاً
(فعل ماضي).
ليست هناك تعليقات:
إرسال تعليق